مش مقلي
السلام عليكم
التاج ده انا سرقه من نعكشة عشان عاجبني
هو تقريبا تاج يعني تعريف لشخصية جاية من كويسشن تاج
مش تاج اللي بيتلبس فالراس.. المهم في كلم ممكن يضايكوا جوة
بدأت تدون من امتي ؟ و دخلت العالم ده ازاي ؟
انا عملت المدونة في رمضان...ولكني بدات اتابعها من ساعة ماتش مصر والكاميرون الاول بتاع غانا 2008 وعملت بوست افكار فعقلي بتزعقلى وعجبني جدا فكرته - بحب قوي اشكر فنفسي ولو حد قالي ان فكرته وحشة مش هيسمعله - ودخلت العالم عن طريق كليك على كريات نيو بلوج... انا دخلت عشان اتعرف اكتر على حد معين
ايه كان انطباعك في البداية ؟
ان البلوج ده فاااااااااااشل .. ولسه لحد دلوقتي عندي الانطباع ده بالنسبة لمدونتي لاني ولا بضيف جديد لحد ولا بعمل عمل الناس تستمتع بيه ...انا يمكن بستفاد منه ك رياضة ذهنية .. او افضفض بس اشارك بني ادمين همي ونكدي عشان كده انا حطيت لوجوهات دينية عشان اخد ثواب
يعني من الاخر انا المستفيد
مين أكتر واحد بتهتم بتعليقه علي بوستك الجديد؟
بصراحة ...كلهم بيضيفوا ليا .. بس على حسب البوست بستنى تعليق
يعني مثلا لو بوست عن الوضع المتدهور فمصر مش بستنى حد عشان عارف ان كله هيشتم فمبارك ومش واخد باله انه سبب في اللي بيحصل
ولو بوست عن علوم بستنى من توووكا
ولو عن الزواج بستنى من ابو صابر "الراقص مع الذئاب" بالتحديد والباقى طبعا بيضيفوا لي افكار تحفة
ولو عن القاهرة بستنى راي appy و نعكشة
ولو بوست ديني بستنى راي عاشقة النقاب
كده يعني
مين المدون اللى عرفته وعايز تقابله؟
بصراحة معرفتش حد...
لان التدوين مش اتصال مباشر اقدر اعرف بيه اذا كان حاطط قناع ولا لا..وان كنت عايز اقابل محمد صابر مرة
ايه اهم حاجة اتعلمتها فالتدوين؟
اني لو اتخنقت من حاجة اطلعها على روقة وقلم...
اني بقة اسمي دبشة..appy بتناديني
ايه اكتر حاجة كرهتها؟
اني ارد على واحد مايكونش قرى الموضوع اصلا...او اني اروح لواحد مجاملة..او لو لاقيت واحدعامل بوست 16 متر عشان فكرة صغيرة ماتستهلش ...عشان كده مابعلقش الا لو قريت البوست كله..وسعات كتير بقرا بس بكسل اعلق
ممكن تدي مثال على اللي بتحلم بيه؟
من سياق الاسئلة انت اكيد قصدك حلم عن المدونة .. لو كده يبقى انا نفسي تكون منظمة زي نعكشة وعدد زواري زي فرنسا هانم و آبي و اضيف بسمة للناس زي اخف دم واضيف فكرة زي د.حماس (بس هو مش فاضي للمدونة دلوقتي) و عاشقة النقاب
انما لو في حياتي ..فانا نفسي اعيش في دولة يحكمها الاسلام بجد... وده مش موجود ف اي دولة فالعالم
حاسس ان التدوين له تأثير ؟
اي نعم
له ايجابيات مثل انه رياضة ذهنية وفضفضة وساعات بستشير ناس عن اشياء تخصني
ولو سلبيات فالوقت ده كله قدام المدونات حرام اضيعه من غير ما استفيد منه من خلال زيارتي لمدونات فاشلة
طيب كلمة اخيرة ..
اي حاجة مجنناني
بطلعها على لساني
دي هواية مزولاني
مخلياني فعالم تاني
مزاجي هو دماغى
والحشيش هو الاغاني
بعبر بيه عن كياني
لو مش عجبك بجد
ماتجيش هنا تاني
السلام عليكم
14 comments:
nice answers ...
دبشه
شايفه اسمى مرتين فى المدونه يا لهوى هو الدكتور قالك اكتب اسمها علشان تخف ههههههههههههههههه
الا بقولك ايه يا دبشتى الجميله انت ياللى اخرتك هأخدك عند المعديه وارميك هناك
انت تعرف دكتور حماس
النبى على قلبك لو تعرفه سلم عليه كتيرررررررررر
وان كان على ابو صابر عيب عليكم يا بتوع الاسماعيليه ليه مش بتقابلوا بعض
اخص عليكم اخص لا زعلتنى منك هو ابو صابر بخيل
اممممممم لا تلاقيك انت اللى بخيل
ههههههههههه
بص يا دبشه كونك مش شايف اهميه او انك بتفكر فى حاجه مفيده فبقولك لا لان بجد انا من النقاش الدبشاوى معاك بطلع بأفكار واكيد بستفيد
anonymous
---------
ignored
appy
----
يعني بكلم د.حماس على الايميل..ماليش علاقة بيه قوي
اصلي لو قابلته هتضر اعزمه على عصير قصب ..ومفيش دلوقتي قصب بربع جنيه..هتبقى تكاليف بعيد عنك
والله؟؟ يعني انا مفيد...طيب شكرا جزييلا
نورتي
عبدو الفضولي : انا دخلت عشان اتعرف اكتر على حد معين
يا ترى ميييييييييييييييي????????? :P
إلا صحيح ليه يا عوض مبتحبش حد يقولك فكرته وحشة مع اني مقريتوش اصلا ؟؟؟؟؟؟؟؟
ساعات بتبقي مفيد يا حمزة بعرف منك اخبار جديدة ( زي خبر الكابلات اللي اتسرقت)
و بتالف حاجات بعضها(دة لزوم الرخامة) كويس
بالنسبة للبوستات ال16 متر دية مشكلة سيادتك يا فندم
بس لما واحد يكتب عن حاجة 16 متر يبقي حسها قوي
مع ني بؤمن قوي بخير الكلام ما قل و دل
بس لازم اعترض
طيب هوه اية الانانية دية يا بشمهندس
إلا صحيح انتي اشتغلي اية
محولتش التاج لبشر تانية لية؟؟؟
مكنتش اعرف عنك كدة
يلا خير
دمت سالم
سلامٌ عليك
زيارة اولى..
سعيد بالصبغة لاسلامية للمدونة..وجميل اسلوب ردك على التاج.."مميز" حقا
دمت بخير ..
جيد هذا الكلام ولكنه مهم وخطير
انا اتفق معك فى نقطه انك لم تستفيد شئ من التدوين
قليله هى المدونات التى تضيف شيئا
مدونه جميله
لى زيارات اخرى ان شاء الله
تحياتى
السلام عليكم ورحمة الله وبركاته
سرقت التاج
وحاطت شعارات اتباع السنه وحركات
وفى الأخر تسرق
ئوئوئو
دا كلام
ربنا يسترها
بس فى حاجه غريبة
يعنى انت عملت البلوج علشان تعرف حد أكتر وبتقول فى نفس الوقت انك ماكونتش أصحاب من البلوج علشان دا مش مقياص للشخص
مش كلام مناقض بعضو
ولا ايه
اما بالنسبة لموضوع اللينك اللى بعتو فأنا مش حابه أخدو علشان تكون انت مميز فى اللى عملتو دا
ربنا يعينا كلنا على أتباع سنتة الرسول ادعيلى
يلا سلام
أختك توكا
vague
أحلي حاجه عجبتني ان التدوين فضفضه
انا بحس ان مدونتي هيا العالم بتاعي لوحدي اللي مش فيه اي حد غيري
تحياتي
اجابتك حلوه اوى
بس انت ليه معتبر المدونه بتاعتك فاشله انا شايفه انها كويسه اوى
وعلى فكره اخر حته فى البوست جامده اخر حاجه
السلام عليكم ورحمة الله وبركاته
ايه ياعم الغيبه دى
ربنا يستر
السلام عليكم
سقة
استغفر الله العظيم
روح يابني رجعه لصاحبته عيب
وكمان حرام
هههههههههههههه
عموما انا لمست مصداقية في تعليقاتك ودة افضل طبعا
انا كمان ما بحبش المجاملات
كل عام وحضرتك بخير
على فكرة وضبوا اسماعيلية كويس
هتنور بينا تاني الاسبوع بعد الجاي
يلا
تحياتي
السلام عليكم
انا برده زيك كده اتخبطت تاج برده
بس التاج بيخلى الناس تتعرف عليك اكتر
و يتعرفوا على شخصيتك ....
أجاباتك جميلة
دمت سالم
السلام عليكم ورحمة الله وبركاته
كل سنه وانت بخير والى الله أقرب
أختك توكا
جزاكم الله خيرا لكل من سأل عني
وكل من مدحني وقال انه لا يكل ولا يمل من مدونتي
Post a Comment