أوبااااااا.... أوبا أوبا أوبا
انا دلوقتي ماسك الشنطة وطالع على اوروبا
من زمان وانا بحلم بيها
اللحظة دية اللي انا فيها
اهلي صحابي جيراني هيخلوا دمعة تنزل من عينية
مش بفكر في اي حاجة غير الايام اللي جاية
أوبااااااا.... أوبا أوبا أوبا
قبل ما اجهز الشنطة عشان اروح اوروبا
امي جهزتلى البؤجة ومعاها الشنطة
حطالي فيهم فطير ووزة وبطة
هطلع من تحت لفوق وهنط حتة نطة
واروح هناك واجيب فلوس كتير ومساري
واعيش حياتي فوق فوق ففوق فالعالي
ولا عدش في حاجة هتشغل بالي
هبقى كويس ومبسوط
واعيش حياتي يوميين مزبوط
وانزل ديزني لاند واشووف
ميكى وبندق وبطوط
واركب قطر حياتي بسرعة قبل ما يعدي ويفووت
واروح هناك واجيب فلوس كتير
واسيب الوزة والبطة وشوية الفطير
واعيش حياتي قشطة وانسى الفول والمش
في كلامي مركزين ولا انتوا مش
مركزين ولا انتوا مش فاهمين
ميت مرة قلت لما الفايجو يتكلم
كله يركز ويقعد مبلم
أوبااااااا.... أوبا أوبا أوبا
انا دلوقتي خلاص وصلت جوة اوروبا
مشيت في شارع طويل نضيف مافيهوش زبالة
قلت مش معقول اكيد ده حلم ده استحالة
ولاقيت شباب شكلها ظريف وبنات دمها خفيف
قلت لما اكمل لفة اخدلي جولة حرة
كان نفسي من زمان اطلع من جوة لبرة
بصيت لاقيت شباب شكلهم مش غريب
لاقيت واحد بيقولي تعالى يا ادم مش بردو عيب
لازم نعمل الواجب ده احنا من نفس البلد
انا قلت الواد ده 100 ميه اما حتة ولد
ومشينا مع بعضنا وسرحنا فالكلام
قالي انتا عندي هتقعد تبيت تاكل وتنام
انا لافف البلد دي وعارفها حتة حتة
قلتله قشطة يا صاحبي وانا معايا وزة وبطة
قالي تمام يا مان.. معايا انت في امان
هظبطك فالشغل هنا واديلك فلوس كمان
أوبااااااا.... أوبا أوبا أوبا
بعد ما اضيتها مع صاحبي اللي قابلته في اوروبا
صحاني من عز النوم واداني في ايدي سلاح
قالي علشان تاكل عيش لازم هنا تكون سفاح
قلتله بس يا صاحبي هيا العملية دي امان؟؟
قالي انت مع اخوك يبقى انت مع سوبر مان
نزلنا في حتة ضلمة ومعان طبنجتين
الناس متسبتين
طلعنا ورق متين
وبسرعة رحنا جاريين
عالعربية احنا ناطين
على دواسة البنزين
فالطريق كنا دايسين
عدينا من 20 كمين
طبعا كنا هربانين
أوبااااااا.... أوبا أوبا أوبا
بعد اول عملية ليا جوة فاوروبا
مرة ورة مرة.. عملية وراها التانية
البلية بدأت تلعب والحياة بقت حاجة تانية
لحد ما جه اليوم ولاقيت صاحبي داخل معجون
قلتله هوة اللي عمل فيك كده عاقل ولا مجنون
قالي فكك يا ادم النوبة دي فيها جنون
قلتله سبلي الموضوع ده وانا اوريك دموع من العيون
لمينا بعضنا ونزلنا جري عالعصابة
مكنش ناقصنا غير حاجة واحده هية الدبابة
وضربنا على بعد رصاص لمينا حولينا الناس
صاحبي قاللي رحنا بلاش الناس دي مفيش عندها احساس
لحد ما جه في يوم ولاقيت الباب بيتخلع
داخل علينا ناس كتيير يخرب بيت الهلع
ببص لاقيت صاحبي وشه جاب الوان الطيف
كأن الموت جاله وبيطوف حولينه طيف
قلتله اهدى يا صاحبي انا هعمل حتة حركة
بس انت ادعلي ربنا يوفقيني ويديني بركة
اتشقلبت شقلبتين ووقعت من الكومودينو الزهرية
فتحت عنينا بصيت لاقيتني لسه في اسماعلية
قلت دي بلدنا واحنا هنفضل فيها عايشين
ياريت الحكومة ترحمنا ولا هما مخلدين؟!!
3 comments:
هههههههه
أوباااااااااااا
و فجأة صحيت من النوم
و لقيتنى لسة ف مصر
قلت الحمد لله
د.حمـــــــاس
اوبا اوبا اوبا
ايه يا عم ده ايه ده
يخرب عقلك يا ادم
جوووووووووووون جووووووووون
ربنا يوفقك يا عم هو الكيميا بتعمل فالناس كده يا دكتور
ربنا يوفقك يا رب
dr.hamas
والله شرف ليا انك تشوف المدونة
بس للاسف جت في حاجة تهييس واي كلام
يس والله انا في ايام امتحانات دلوقتي ومش فاضي اعمل اي حاجة
سدرة
كويس ان حاجة عجبتك..
بس متهيألي انتي تخشي تزاكري أحسن
Post a Comment