الفن التجعيدى

بما انى ضايع فى ام الكليه الى انا فيها و لما حد بيقولى اسامى مواد عندنا ببقى فاكر انه بيتكلم على كليه تانيه
المهم كان الحل الوحيد ارجع لهوايتى للترفيه
وانا صغير الناس كانو بيقولولى انى فنان
و كان حلم حياتى اخش فنون جميله بس مرضتش
المهم العاده الحلوه دى رجعت ليا تانى
ففكرت اعملكم شوية رسومات بس عاوز رايكم بصراحه
ولو فى صوره مش عجباكم مش لازم تيأسونى
نبدا باسم الله:
اولا
الصوره دى بعنوان بحيرة البجع

الصوره التانيه بعنوان المرأه المثيره

الصوره التالته بعنوان الوجه الحزين
الصوره دى بعنوان التقاء الاحبه تحت الشمس
الصوره دى بعنوان" لماذا"
الصوره دى بعنوان الاحبه المتخصمين
صوره بعنوان " لاعب الزمالك"
صوره بعنوان " السيجاره تدمير"

دول شويه عملتهم على السريع ايه رايكم فيا و على فكره الصور ليها معانى كتيره للى يدقق و بالتوفيق ليا

والان مع القنبلة:

منى بنت ليزا:

Kun Min

BacK :))

السلام عليكم

انا نجحت الحمد لله وجبت جيد..مش عاوز اقول جيد جدا عشان الأر

المهم انا بعد اقتناعى انى فاشل فالتدوين ..قررت ارجع تانى ..لانى وانا بقرا المواضيع السابقة افتكرت ايام جميلة شوية

ويلكم باك لييا

Kun Min

للتبرع بالدم ..مش هوصيكم

احب اقول لاهل الاسماعيليه ان فى مصابين من مدينه غزه فى مستشفي الجامعه بالاسماعيليه ..
و فى تبرع بالدم فى مسجد ابو بكر الصديق ..
اللى عايز يروح يساعد يساعد يا شباب ..


بالنسبة لاهل القاهره و اللى عايز يجي يساند من جميع انحاء مصر ..
انا هكتب ليكم العنوان و طريقه الوصل الى مستشفى الجماعه ..
لو انت من مصر هتركب عادي من المرج او من رمسيس هتركب سوبر جيت ..
اول ما هتنزل هتنزل عند موقف اسمه الموقف الجديد ..
الموقف ده فى حي اسمه حي السلام ..
بجوار جامعة قناه السويس ..
و الموقف ده بيبعد عن المستشفي حوالى 5 دقائق فقط ..
لو اخت تاكسي فى حوالى دقيقه هيكون موصلك للمستشفي ..


ايضا يا اهل العريش و سيناء ..
ياريت التوجه الى مستشفي العريش العام و مستشفي رفح و مستشفي الشيخ زويد ..
هناك ايضا تبراعات بالدم ..

http://vaguetoto.blogspot.com/2008/12/blog-post.html

جواب الوبسطة ل تراب الميرى

بعد استأذان هاني صاحب الموضوع:

من سلسلة يوميات شاب عاطل

يقدم:

يااااااااااه يا جماعة ... يوم مش عادى .. يوم يكتب فى تاريخ اسرتنا العظيمة ... وليه لأ .. أصل ده اليوم اللى فيه جالى جواب التعيين من القوى العاملة .. بعد انتظار سنين ... ياسلااااااااااام .. آخيرا .. طولت الميرى وهاتمرمغ فى ترابه !!
ففى هذا اليوم جاءنا السيد البوسطجى وخبط على باب بيتنا ... بس للأسف محدش فتحله !!
المهم .. نزل البوسطجى فى اليوم ده بعد مايئس من كتر الخبط ليجدنى فى وجهه على السلم ( كنت لسه راجع بعد قضاء نصف يوم تقريبا فى التسكع يمين وشمال فى أرجاء المحروسة دون هدف انا ومجموعة من الشباب الطموح الذى يملأ بلدنا الحبيبة !! ) .. ودار بيننا هذا الحوار ..
البوسطجى : لو سمحت يا محترم .. مش دى شقة الاستاذ سيد الشحات !!
انا : آه هى بعينها .. أى خدمة !!
البوسطجى : أومال هى مفيش حد فيها ولا ايه .. اصل ايديا ورمت من كتر الخبط !!
انا : لأ ازاى .. دى شقتنا ... وأبويا جوا ... انا متأكد
البوسطجى : اومال ما بيفتحش ليه يا عم ؟!!
انا طارقا الباب بشدة : افتح يابا .. انا عارف انك جوا ومش راضى تفتح كالعادة عشان ماتدخلنيش ...
صوت ابويا من الداخل : أرجع ياصايع مطرح ما كنت .. أحسن انا لو فتحت الباب هافتح بعديها نافوخك !!
انا بأحراج من البوسطجى : آ .. نياهاهاها .. معلش اصل ابويا بيحب الهزار .. دايما كدة انا وهو ... ابن وابوه بقى !!
البوسطجى بنرفزة : ربنا يخليكوا لبعض يا سيدى .. بس انا عايز اتنيل امشى .. انا زهقت !!
انا : حاضر ياعم حلمك شوية .. افتح يابا انا مش لوحدى .. فى واحد معايا !!
صوت ابويا من الداخل : خده .. وأنزل !!
انا : اخده وانزل فين بس ... ده ضيف مايصحش !!
صوت ابويا من الداخل : ضيف ؟!! ... ضيف مين ؟؟ .. تلاقيه واحد من أطفال الشوارع اللى انت سارح معاهم طول الليل ابوه طارده من البيت وجاى يبات عندى .. طبعا ... ماهم قالولك ان دى العربخانة اللى جايبهالك ابوك !!
انا بنرفزة : وبعدين بقىىىىى ... يابا أفتح ده محضر من القسم !!
البوسطجى : محضر ايه يا أخينا .. انا بتاع البوسطة !!
انا : ياعم هى هاتلزق يعنى .. انا بقوله كدة عشان يخاف ويفتح !!
صوت ابويا من الداخل : محضر من القسم ؟؟ ... يبقى أكيد جاى عشانك يا متسول .. خليه ياخدك وينزل بقى !!
البوسطجى متدخلا : يا أستاذ سيد يا شحات افتح ابوس ايدك وخلصنى .. فى جواب مستعجل جايلك من البريد !!

====================

بعد هات وخد .. ومهاترات وصلت الى النصف ساعة على باب منزلنا الموقر ... آخيرا .. فتح والدى الباب !!
ابويا : نعمين !!
البوسطجى : فى جواب جاى على العنوان ده .. للسيد عاطل سيد الشحات !!
انا : ياعم .. ماتقول من الصبح ان الجواب ليا انا .. مانا واقف جنبك من الصبح اهو ... هات يا أخى !!
البوسطجى بصدمة : هو انت عاطل الشحات ؟!!
انا بنرفزة : يعنى انا واقف جنبك من الصبح عمال أقول افتح يابا .. افتح يابا .. هابقى مين .. مرات ابوك يعنى .. اسفوخس على دى غباوة !!
طراااااااااخ ( صوت البوسطجى وهو ينبطح أرضا من هول الصدمة !! )
انا : ايه ده ... هو اغم عليه ولا ايه ؟!!
ابويا ببلاهة : لأ .. ده باينه مات ... خش وأقفل الباب وراك !!
انا : !!!!!!!!!!!!!!!!!
ودخلنا انا ووالدى المبجل .. وتركنا البوسطجى بالخارج .. غارقا فى احلامه !!

====================

ابويا : هـــا ... فيه ايه بقى الجواب ده يا سيدى ؟!!
انا بثورة فرح بعد قراءة الجواب : نياهاهاهاهاهاهاها ... انا اتعينت فى القوى العاملة يابا ... عاااااااااا ... عووووووووه .. عىىىىىى
ابويا على طريقة فؤاد المهندس فى "عائلة زيزى" : وبقيت انـــا المديـــــــــــــــــــــــر !!
أمى ممسكة بالكبشة وقادمة من المطبخ بلهفة : ايه خير ... فى ايه ؟؟؟؟
انا : انا اتعينت فى القوى العاملة يامّه ... آآآآآآآآآآآآآآآآآآآآآآآآآآآآه
امى : لولولولولولولولولى ... القوى العاملة مرة واحدة ؟؟!!!
انا بمنتهى السذاجة : يا سلااااااااااااااام ... يا ترى هايمسكونى ادارة ايه ؟؟!!!!!
ابويا بتريقة : هيئة الآثار بأذن الله !! ... انت متأكد ياض يا أهبل انت ان الجواب ده جايلك انت ؟!!
انا بمنتهى التفاؤل والأمل : طبعا جايلى انا ... اهوه الى السيد "عاطل السيد الشحات" ... آخيرا هابقى مسئول كبير فى البلد !!
ابويا ببرود : يللا .. فساد بفساد بقى .. يعنى هى جت عليك !!
انا : لا وشرفك ... ده انا هابقى فى نزاهة عبد الناصر وفى قوة السادات ... اوعدك يوم ما هاتحال على المعاش هايحطوا تمثالى فى الميدان بدل تمثال مصطفى كامل !!
ابويا : أقطع دراعى لو ماكانت نهايتك زى سليمان الحلبى !!

تانى يوم جهزت نفسى ... ولبست بدلة ابويا اللى خرج بيها على المعاش ... مش من حلاوتها طبعا ... بس لأن دى البدلة الوحيدة الموجودة بمنزلنا الموقر .. وابويا اصلا كان واخدها من جدى الله يرحمه بارضو ... يعنى بدلة عمرها أكثر من 80 عام !! ... فلكم ان تتخيلوا منظرها !!
المهم نزلت من بيتنا فى الثامنة صباحا على غير العادة متوجها الى عنوان الوظيفة حيث مصلحة التليفونات ... ودخلت الى أحد المديرين كى يعتمد اوراقى ويعرفنى مهام وظيفتى الجديدة ( يا حلاوتك فى الميرى يا واد يا "عاطل" )
المدير قارئا اوراقى : عاطل سيد الشحات ... بالذمة ده اسم ده ؟!!!
انا : معلش بقى يا سيادة المدير .. ابويا اصله بيخاف عليا من الحسد ... فقال يسمينى اسم ماتسماش قبل كدة .. مع انى مش عارف انا في ايه فى حياتى يتحسد اصلا .. يمكن البدلة اللى انا لابسها !!
المدير مكملا : بكالوريوس تجارة ... عازب ...
انا مقاطعا : حضرتك كل الكلام ده انا حافظة .. ماهو ده ورقى سعادتك ... لايمنى بقى على الشغل الله يستر عرضك !!
المدير ببرود : طيب يا سى عاطل ... اطلع استلم شغلك على ماكينة التصوير الخاصة بالمصلحة فى الدور الرابع !!
انا مصدوما : مكنة تصوير ؟؟ ... انا بكالوريوس تجارة ... اقف اصور ورق ؟!!!
المدير : والله دى الوظايف المتاحة عندنا يا حبيبى .. مش عايزها فى الف غيرك يتمنوها !!
انا : لالالا .. خلاص يا بيه اصور ورق ... اهو حتى شغلانة مريحة ومافيهاش مسئوليات ولا مصايب !!
المدير : ازاى ... الماكينة دى عهدة .. وورق التصوير ده عهده .. ولو ضاعت منك ورقة واحدة هاخرب بيتك ... انا عاددهم ورقة ورقة وكلمة كلمة !!
انا : امرنا لله .. حاضر يا بيه ... طب كنت عايز اعرف ... بالصلاة على النبى كدة بالنسبة للمرتب .. يعنى حضرتك هايبقى ايه النظام يعنى ؟؟
المدير : آه .. مرتبك هايبقى 97 جنيه ... بالحوافز والمكافآت يبقى كله كله ... 103 جنيه !!
انا : لالالالالالالالالالا .. قليلين قوى !!
المدير : ايه مش عاجبك المرتب ولا ايه ؟!!
انا : لا .. انا مش عاجبانى الحوافز ... مش شايف ان 6 جنيه حوافز قليلين شوية ؟؟ ... ماتبحبها شوية يا راجل !!
المدير : !!!!!!!!!!!!!!!!!!!!!!!
انا : يعنى هو مش كفاية هاتوقفونى اصور ورق وساكت .. كمان مفيش فلوس !!
المدير : يا إبنى انت لسه جديد وماتثبتش ... لما تتثبت مرتبك هايقفز بتاع 10 جنيه بحالهم !!
انا على طريقة سعيد صالح فى "العيال كبرت" : يااااااااااااااه .. بيكسبوا بقى المصوراتية دول على كدة !!

====================

رجعت بيتنا وانا أجر قدماى من هول الصدمة .. مصوراتى ... وبـ 103 جنيه فى الشهر .. وماشى احسبها .. طب انا لو كل يوم ركبت مواصلات رايح بحوالى جنيه ونص وجاى بحوالى جنيه ونص وابقى امشى باقى السكة يبقى كدة 90 جنيه فى الشهر ... ولو ضيفت عليهم ساندويتش فول بنص جنيه افطر بيه يبقى كدة 15 جنيه ... يبقى كله 105 جنيه ... يبقى انا عايز استلف 2 جنيه كل شهر عشان اشتغل !!!
دخلت بيتنا وانا اضرب أخماس فى اسداس ...
ابويا : ها .. عملت ايه ياعم أحمد يا عرابى !!
انا بسخرية : عايزين يمسكونى منصب حساس اوى .. وانا متردد والله اوافق ولا لأ !!!!
ابويا ببلاهة : لو "حرس الرئيس" ... وافق يابنى ... دول بيجيبولهم وجبات من "كوك دور " !!
انا : !!!!!!!!!!!!!!!!!!
امى : يا خويا أى شغلانة والسلام .. المهم المرتب كام يا بنى ؟!!
انا : لالالا .. المرتب حاجة عظيمة ... مش عارف انا هاصرف المرتب ده فى ايه .. انا بفكر اتبرع بنص مرتبى لترميم البيت !!
ابويا : كدة يبقى بترمى فلوسك فى الارض .. لأن البيت ده لو اترمم هايقع !! .. هو البيت ده كدة لو انضرب فيه شاكوش واحد هايتهد على اللى فيه .. انا شايف انه أحسن تحوش نص مرتبك ده مادام هو كبير كدة وبعد سنة ولا حاجة نشترى "اسماعيل بانجورا" !!
أمى بلهفة : صــح والله ... انا من زمان وانا عايزة اجيب أباجورة احطها فى الصالون !!
ابويا لأمى : ابجورة ؟.. وبعدين هو فين الصالون ده .. ده الشقة كلها اوضة وصالة ومطبخ وحمام مشترك مع الجيران !!.. خشى نامى يا ذينب !!

====================

وبعد ما شرحت حقيقة الموضوع لوالدى الحالم ... وبعد ان أكتشف الحقيقة المرة !!
ابويا : تصدق بالله .. انا لحد دلوقتى مش عارف احدد سبب خلفتى لك ... قوللى كدة انت فايدنى بأيه من يوم ما اتولدت لحد دلوقتى ؟!!
انا : وانا مالى يا عم ... هو انا يعنى كنت لقيت شغلانة اصرف بيها على نفسى وقولت لأ ؟؟؟
امى : وكسة توكسك اكتر ما انت موكوس يا موكوس يا ابن الموكوس !!
انا : وبعدين بقىىىىىىىىى !!
طق طق طق طق ( صوت الباب بيخبط )
امى على الطريقة الشعبية : ميييييييييييييييييييييين ؟!!
صوت من خارج الباب : بــــــــــــوســـــــطــــــــــة !!
انا فاتحا : ايه ده ؟؟ ... انت تانى ... انت ياراجل انت مش كنت مت ؟!! .. ايه اللى رجعك تانى ؟!!
ابويا ببلاهة : تلاقى النهاردة الخميس الكبير بتاعه !!
البوسطجى : بقى كدة يا جدع تسيبنى المرة اللى فاتت مرمى على السلم ساعتين لحد ما السكان خدونى على الوحدة وفوقونى هناك على آخر لحظة قبل ما أطلع فى الروح ؟!!!
ابويا : قصره .. عايز ايه ياعم العفريت ؟!!!
البوسطجى : انتوا المرة اللى فاتت اخدتوا منّى جواب التعيين وما مضيتوش على الاستلام !!
ابويا قابضا على يد البوسطجى : نمضى استلام على جواب التعيين ؟؟!!! .. ابو 103 جنيه ده ... اوى اوى يا حبيبى ... تعالى ادخل عشان نمضيلك ... اقفل الباب يا وله !!
انا : حاضر يابا .. تحت امرك ... ادخل ياض !!
البوسطجى برعب : هو فى ايه ... سيبنى ياعم انت !!
طاخ .. آآآآآآآه .... طوخ .. آوووووه ... طيخ .. ايييييييه !!
البوسطجى صارخا : الحقوناااااااااااى ... آآآآآآآآآآآآآآآآآه ... يا عالم .. يا هوووو ... طب انا ذنبى ايه ؟!!
انا مرددا اغنية صباح : ذنبك بحبك !!
ابويا مكملا : هو بعد الحب ذنب !!
امى : يانا .. يانا ... لولولولولولولولولولولوى !!

أطلبى البوليس يا زينب

أهلا بيكم ...
بتوحشونى والله يا جماعة ... شوفوا بقى المرة دى انا جايلكوا فى ايه ... والمصيبة المرة دى كانت قد ايه
نخش فى الموضوع ...
آخيرا وبعد طول عنــــاء قرر العبد لله اتخاذ قرار من شأنه ان يغير طريق حياتى بشكل جزرى ... لقد قررت ..
اتجوز !!
طبعا عريس زيى يعتبر لقطة لأى بنت ... يعنى تلاقى فيا مواصفات نادرا لما تلاقيها فى اى متقدم للزواج
فأنا على سبيل المثال لا الحصر طبعا ... عاطل + شحات + فقرى !!
اظن ان دى مواصفات يصعب على اى عائلة تبحث عن النسب الأصيل ان تجدها فى غيرى الا فيما ندر ... ومن هذا المبدأ فقد تشجعت لهذه الخطوة الجريئة
مبدئيا كدة ... بم انى عاطل .. فأول حاجة هافكر فيها عشان اقدر اتجوز ... هى مصدر اعتمد عليه للصرف على تكاليف هذا الفيلم ... وطبعا بدون تفكير لم اجد نفسى الا وانا انطق اسم واحد فقط ... ابويا !!
بعد تكتكه ومخمخمة لأيجاد طريقة للدخول بها لوالدى العزيز لأقناعة بالمسألة بدون خسائر مادية او روحية ( مين روحية دى ؟!! ) ... جاء أخيرا اليوم الذى اخترته لأفاتحه فيه بالموضوع ... ففى هذا اليوم استيقظت باكرا ... باكرا جدا ... قبل ان يستيقظ اى شخص فى منزلنا الموقر ... وانتظرت كثيرا حتى استيقظ الوالد ( طلع نومه تقيل اوى !! )
فتح والدى باب غرفته وهم بالخروج وهو يدعك بكلتا يديه فى عيناه ليجدنى فى وجهة مباشرة !!
ابويا : حراماااااااى ... حرامااااااااااااااااى ... اطلبى البوليس يا زينب ... يا زينااااااااااااااااااااب ... انا مش هاسيبك الا فى القسم يا نصاب .. هى العملية ناقصة ... جاى تسرق غلابة يا أهبل ... طب روح اسرق المعلم سيد اللى فوقينا .. اهو هاتلاقى عنده حاجات كتير تتسرق ... انما احنا هاتسرق من عندنا ايه .. كباية شاى ولا رابطة بقدونس ... تعرف انا هاسلمك للبوليس مش عشان انت نصاب لأ .. انا هاسلمك عشان انت اهبل ... عارف يعنى ايه اهبل ؟؟
انا محاولا التخلص من قبضة السيد الوالد : استنى يا زينب .. اوعى تقربى من التليفون ... يخربيت اللى يزعلك ... انا ابنك يا حاج !!
ابويا : كداب انا ابنى صايع ومابيجيش البيت قبل الضهر ... العب غيرها يا نصاب ... يا حراااااااااااااااامى ... مش هاسيبك الا فى القسم !!
انا ممسكا بالنظارة : طب خد بس يا باشمهندس البس دى وركز كويس !!
ابويا بعد ما لبس النضارة : ايه ده ؟!! ... انت ايه اللى مقعدك فى البيت الساعة دى ... يبقى اكيد عملت مصيبة برة وجاى تستخبى هنا يا صايع ( وراح ماسك فيا تانى ) .. المرة دى بقى انا اللى هاسلمك للبوليس بأيدى ... انتى لسه ما اتصلتيش بالبوليس يا زينب ؟؟!!
امى : خلاص بقى يا حاج اهدى شوية خلينا نشوف فى ايه ... وانت يا مدعوق ... ايه اللى رجعك الساعة دى ؟!!!
انا : هو في ايه .. مش بيتنا ده بارضو ... ولا ده بيت السلاحف ... ولا ايه ؟!!
طرااااخ ( قلم على الهوا !! ) .. وراح قافش فى هدومى تانى !!
ابويا : بيتك ؟؟ ... هو اللى زيك ليه بيت يا صايع .. ده السلاحف بتقعد فى بيتها على طول ... انما انت برة البيت على طول يا متشرد ... آل سلاحف آل ... جاك سلاحف نينجا لما تبقى ترميك فى بلاعة كهربا يا بعيد !!
انا بنرفزة : جرى ايه يا حاج ... ما تهدى شوية .. وشوفنى جايلك فى ايه ... الله ؟؟!!!
امى : خلاص خلاص يا حاج اقعد كدة وروق .. وشوف ابنك عايز ايه منك .. على ما أروح احضرلكوا الفطار ... ربنا يهدى سركوا ...

بعد مرور ساعة او ازيد تقريبا من الشد والجذب ... تخللها الفطار المصرى الشهير .. الفول وتوأمه الطعمية .. ثم كوباية الشاى بالنعناع البلدى ... تمت السيطرة على والدى المبجل .. وهدأت الحرب المشتعلة وحصلنا على هدنة والحمد لله !!
ابويا : أدينا يا سيدى فطرنا مع بعض على غير العادة .. وحبسنا بكوباية الشاى كمان ... ممكن تقولى عايز ايه ... وايه اللى كان موقفك قدام باب الاوضة من طلعة الشمس زى الحرامى اللى مخلص شغله وماشى كدة ؟!!
انا : شوف يا حاج ... بدون مقدمات .. واحراج وكلام ورغى كتير ... انا هادخل معاك دوغرى !!
ابويا : تعجبنى !!
انا : أنا عايز اتجوز !!
ابويا : أطلبى البوليس يا زينب !!
انا : يوووووه ... ايه يا حاج ... انت ليك حد واحشك فى القسم ولا ايه ... هو كل جملة مفيدة نقولها لازم تتختم بالبوليس ؟!!
ابويا : ما هو لما مايبقاش عندك دم للدرجة دى ... ووصلت للمرحلة دى من الاوعى ... يبقى لازم أطلبلك البوليس عشان ياخدوك فى الحجز يفوقوك بكام قلم !!
انا : شوف يا حاج ... انا مش هاكلفك كتير ... انا كل اللى عايزه أوضة على سطح اى عمارة بمنافعها وقضيت على كدة !!
ابويا : آه ... ومين بقى بنت المجنونة دى اللى هاتوافق تتجوز واحد عاطل وشحات زيك ؟!!
انا : يووووووووه ... ده الحريم على قفى من يشيل يابا ... ده دلوقتى اللى بيتجوز واحدة .. بيدوله اختها هدية !!
ابويا : اطلبى البوليس يا زينب !!
انا : ليه تانى ؟!!
ابويا : عشان انت كداب ... ازاى العروسة وأختها ... ما ينفعش ... شرعا لا يجوز !!
انا : يابا .. انا بقولك مثلا يعنى ... اللى عايز أوصلهولك ان البنات دلوقتى بقوا أكتر من عروض المحمول ... وأسهل من مسابقات قناة ميلودى .. يعنى اللى هاتطلبها للجواز دلوقتى ... لا هاتدقق فى مهر ولا شبكة ولا مؤخر ولا الكلام الفاضى بتاع زمان ده ... الأهالى دلوقتى بقى كل اللى يهمهم حتة يتلم فيها الواد والبت وخلاص ... ده اللى عنده بنت دلوقتى بقى بيشتركلها فى قناة زواج اللى على الدش عشان يشوفلها عريس .. يعنى بيدللها على راجل !!
ابويا : طب وهاتصرف عليها منين بعد الجواز يا فالح .. ده انت صايع .. لا شغله ولا مشغلة !!
انا : والله بتتقضى ... وانا مقدم على كام شغلانة كدة وربك يكرم بقى .. بارك انت باس يا حاج ... وهى هاتسلك !!
ابويا وهو يحضننى بمنتهى التلقائية : الف مبروك يا حبيبى ... ياااااااااااااااه جه اليوم اللى اشوفك فيه عريس ... يا سلاااااااااااااااااااام ... انا جعان !!
انا : !!!!!!!!!!
امى : ما أحنا لسه شايلين الفطار يا راجل ... ايه ... لحقت هضمت ؟!!
انا مستدركا : المهم دلوقتى يا حاج ... انا منمًر على واحدة كدة بنت ناس .. وكنت عايزك تيجى تشوفها معايا ..
ابويا : ومين بقى سعيدة الحظ اللى بختها الأعمى جابها فى سكتك ؟!!
انا : سونيا جارتنا !!
ابويا : اطلبى البوليس يا زينب !!
انا : ليه بس يا حاج ... ما كنا ماشيين كويس ... مالها بس سونيا ؟؟
ابويا : انت ياض عايز تتجوز واحدة ... بتبات فى بيوت الناس اكتر ما بتبات فى بيتهم ؟!!!
انا : لالالالالا .. انا ماسمحش الكلام ده يتقال ابدا عن سونيا ..دى ست سمعتها زى البرلنت !!
ابويا : عشان لما ابقى اقول عليك اهبل تبقى تصدقنى .. انزل ياض كدة ووقف اى عيل صغير ماشى فى الشارع .. وأسأله تعرف ايه عن سونيا ؟!!!
انا : يابا وعلى فرض ... اللى فات مات خلاص ... واحنا ولاد النهاردة ... والست خلاص اتحجبت دلوقتى .. وبقت حاجة كدة ماشاء الله مثال للمرأة المثالية ... ورمز للعمل الوطنى !!
ابويا : العمل الوطنى ؟؟ ... هو انت هاتتجوز هدى شعراوى ولا ايه ؟؟ ... دى سونيا ياض ... سونياااااااااااااااااااااااا !!
انا : ياعم عارف انها سونيا ... هو انا قولتك عبد الهادى ؟!! ... بارك انت بس الجوازة وهى هاتتقضى وربنا يسهلها ان شاء الله
ابويا وهو يحضننى بنفس التلقائية : الف مبروك يا حبيبى .. آخيرا جه اليوم اللى اشوفك فيه عريس ... يا سلااااااااااااااااام ... بس انا لسه جعان !!

**********************

بعد جلسة المباحثات المطولة على المائدة المستديرة المسماه عند الطبقات الشعبية بالطبلية ... وافق والدى العزيز على العروسة وقرر الذهاب الى بيت العروسة للتقدم !!
وفى مساء اليوم التالى ارتديت قميص جديد آخر صيحة استلفته من أحد الجيران ( الله يستر عرضه ) .. قميص عليه كل الوان الورود المختلفة .. أخضر × احمر × ازرق .. جنينة متنقلة !! .. وارتدى والدى هو الآخر جلبابه الابيض .. صاحب أكبر بقعة زيت فى المنطقة كلها ... رغم اننا بنستعمل برسيل ابو نضافة مالهاش مثيل !! ... ماعلينا ..
انطلقنا على بركة الله متجهين الى منزل الست سونيا ... وما ان وصلنا وفتحت لنا سونيا الباب ... حتى انطلق والدى فى الهتاف .. ازيك يا طاهرة ... يا شريفة ... يا ..
انا مقاطعا : ايه يا حاج ... انت داخل مقام ؟؟ ... خش يابا من غير فضايح .. أحسن الولية دى ايديها طويلة وبتاكلها !!
ابويا بخوف : حـ .. حاضر !!

**********************

ودخلنا وقعدنا ...
ابويا : بسم الله ماشاء الله ... البيت جميل .. وفيه حمامين وصالة كبيرة كمان .. والله ولعبت معاكى يا سونيا .. ده أنا آخر مرة دخلت البيت ده ما كانش فيه أوض !!
انا : طب بس بقى أحسن جايه ..
الست سونيا : يا اهلا وسهلا .. يا اهلا وسهلا ... خطوة عزيزة ... شرفتونا وآنستونا
ابويا : اهلا بيكى يا ست سونيا ... شوفى يا ستى احنا هانخش دوغرى فى الموضوع .. وبدون مقدمات ... من الآخر كدة ... انا جاى اطلب ايدك لأبنى !!
سونيا بضحكة ركيعة : هـــــــــــا هأ هأ هأ هأ هــــــــــــــا
ابويا : ايه ده .. هو فى حد تحت الكنبة ولا ايه ؟!!!
انا : كنبة ايه يابا ... خليك معانا أبوس ايدك
ابويا : اومال ايه الصوت ده ؟!!
سونيا بنرفزة عالية : اخرس انت وهو !!
انا وابويا : ط .. طيب !!
سونيا : وبسلامته ابنك ده بقى ماهيته كام ؟؟
انا : لا حضرتك انا ما باخدش ماهية ... اصل انا مش موظف !
سونيا : مش موظف ؟؟ ... اومال ايه يعنى ... عندك مشروع ؟!!
انا : لا حضرتك ولا عندى مشروع ... انا يا ست سونيا بلا فخر ... عـــــــــاطـــل !!
ابويا : وشحات كمان ... يلا بقى !!
انا : بس يا ست سونيا .. انا مقدم على وظيفة كدة وهاستلمها ان شاء الله اول الشهر الجاى ... يعنى كلام اكيد خلاص !!
سونيا : عاطل وشحات ؟؟ ... آه ... وايه بقى الوظيفة اللى هاتستلمها اول الشهر دى يا عنيا ؟!!
انا : آ ... حضرتك انا هابقى شيف فى كوفى شوب .. بس شغلانة بمرتب محترم محترم يعنى !!
سونيا : شيف فى كوفى شوب ؟!! ... والمرتب هايبقى كام يا ضنايا ؟!!!
انا : صاحب الكافيه أكدلى انه مش هايقل عن 200 جنيه !!
سونيا بضحكة بارضو ركيعة : هـــــــــــا هأ هأ هأ هأ هــــــــــــــا
ابويا : تانى ؟؟ .. لأ مابدهاش بقى .. اما انزل اشوف مين اللى تحت الكنبة !!
انا : ابوس ايدك يابا تقعد مكانك !!
ابويا : ايه يا ست سونيا .. مش عاجبينك الـ 200 جنيه .. بكرة يا ستى بمرور الوقت مرتبه يعلى ... وأهى ايد على أيد وبالصبر كل شىء بيعدى !!!
سونيا : انت عارف يا واد انت انا بقبض كام فى الليلة ؟!!!
انا : ايه واد ديه ؟!!! .. ماعلينا .. كام يا ست سونيا ؟
سونيا : 500 جنيه فى الليلة !!
ابويا : اطلب البوليس !!
انا : بوليس ايه بس يا حاج استنى !!
ابويا : بتقولك 500 جنيه فى الليلة دى اكيد شغالة فى بيت من اياهم !!
سونيا : تف من بقك يا راجل انت .. انا بارضو بتاعة بيت من اياهم ...
انا بلهفة : اومال حضرتك بتشتغلى ايه يا سونيا هانم ؟؟؟
سونيا : انا بشتغل فى تهريب الآثار !!
انا : الآثار ؟!!!
ابويا : الحق يا زاهى يا حواس !!
سونيا : آه الآثار ... شغلانة شريفة ... ومفيهاش مرقعة وقلة أدب
ابويا : آه طبعا شغلانة شريفة ... اتصل بالبوليس !!
سونيا : بوليس لمين يا عنيا .. ما الحارة كلها عارفة انى بتاجر فى الآثار .. بس اللى عنده دليل عليا يثبت ...
ابويا : آه يا منحرفة !!
انا مستفسرا : طب هو حضرتك بتعملى ايه بالظبط .. يعنى بتروحى بالليل تسرقى تماثيل من المتحف وتبعيها يعنى ولا ايه بالظبط ؟؟
سونيا : لالالالالالا .. دى شغلانة كبيرة .. آه .. كبيرة أوى يا سى الأفندى .. وانا مجرد حلقة فيها ... كل دورى فى الموضوع ده هو النقل من مكان الاستلام لمكان التسليم وآخد حسنتى واتكل !!
ابويا : طب يعنى الشغلانة دى مش صعبة على واحدة ست زيك ؟؟
سونيا : بالعكس .. دى الشغلانة دى بالذات ماينفعهاش غير واحدة ست !!
انا وابويا فى نفس واحد : اشمـــــــــعـــــــــنى ؟!!!
سونيا : ايه هو ده ؟ ... قصره .. عشان انا اللى بنقل القطعة من مكان الحفر لمكان التسليم بالعربية وطبعا القطعة دى ببقى رابطاها حوالين وسطى وفوقيها البس الفستان الجينز بتاع الحوامل ... واعمل نفسى حامل !!
انا : ولو اى لجنة وقفتك فى الشارع استحالة تشك فى هدومك !!
سونيا : كلك مفهومية ياسى الاستاذ !!
ابويا : طب والناس اللى معاكى دول مش ممكن يتقفشوا ؟؟
سونيا : يتقفشوا ازاى بس ... اذا كان الناس دول بيبقوا معظمهم ناس تقيله ومسئولين كبار فى البلد !!
انا : مسئولين كبار ؟!!! ... الـــعـــــب !!
ابويا : مصر بتتقدم بينا !!
سونيا : اومال ايه يا سى الاستاذ .. الدنيا حامية .. والكرسى مش دايم !!
انا : طب انتى بتحكيلنا بصراحة كدة ليا ... مش خايفة مننا مثلا ؟!!
سونيا : هـــــــــــــــأ هأهأهأهــــــــــــــأ
ابويا من تحت الكنبة : اطلع من تحت الكنبة يا حيوان ... اطلبى البوليس يا سونيا !!
سونيا مكملة غير مبالية : أخاف منك انت ؟؟ ... انت أهبل ياض انت !!
ابويا : شوفت ... يعنى مش لوحدى ... آدى سونيا كمان بتقول عليك أهبل .. أقتنع بقى يابنى !!
انا : كدة كتيييييييييييييير ... انا ماشى !!
طرااااااااااااااخ ( صوت باب الشقة ينفتح بعد كسره !! )
سونيا : ايه ده انتوا مين ؟ ... وعايزين منى ايه ؟؟
الظابط : آخيرا وقعتى يا سونيا ... ده انتى مغلبانا وراكى من أكتر من سنة .. كله يقف مكانه !!
ابويا ببلاهة : زينب بلغت البوليس !!
الظابط : نعم ؟!!!
ابويا : لأ مفيش ياباشا !!
الظابط : قدامى كلكوا !!

**********************

بعد ليلة طويلة فى القسم من أجراءات واسئلة واجوبة لم تخلوا بالطبع من بعض المناوشات اليدوية من جانب السادة المخبرين !! ( حاجة كدة زى خدمة العملاء ) ... تم أخراجنا من القسم انا ووالدى سالمين بعد ان اثبتت التسجيلات التى أخذت عن شقة المدعوة سونيا ( الله يحرقها ) ان انا وابويا مالناش فى الموضوع .. وخرجت الصحف فى اليوم التالى تزف الخبر التالى :
القبض على أكبر شبكة تهريب آثار فى البلاد .. وتورط مسئولين كبار فى القضية !!
ابويا وهو جالس على الكنبة بجوار والدتى : ها يا حبيبى ... مش عايز تتجوز ؟!!
انا : أطلبى البوليس يا زينب !!

آآآآآآآآآآآآآآآآآآآآآآآآآآآآآآآآآآآآآآآآآه

------------------------------------

طبعا الكلام اللى فوق ده كله مش انا اللى مألفه

ده واحد اسمه هاني وهو بنفسه قالى حطها في مدونتك

راقي باخلاقي

---------------

دي حاجة كده بمناسبة يوم ميلادي: خلصت 20 سنة

افعص هنا

------------------

راقي باخلاقي

هي حملة يدعمها الاخوان المسلمين وعجبتني الفكرة ليها جدا

لاني شايف اني بقيت اقول كلام غريب جدا بعيد عن اللغة العربية او اي لغة اخرى

كما انها تدعو الى التحلى ببعض الاخلاق الحميدة مثل التواضع , كظم الغيظ , واهمها الالفاظ اللى بنقولها

لان مش كل حاجة بنسمعها فالتلفزيون ممكن تتقال..ايوة قصدى على اتش دبور..وغير كده كمان فيه الفاظ غريبة ومش بحبها زي بييس يا ماان .. عسليات..قشطات...ناهيك عن الكلام اللى ماينفعش اكتبه

وياريت كل واحد يبدأ بنفسه ويدعو الناس انهم يعملوا زيه لاني فلا من سنتين تقريبا صاحبي عودني مارميس ورق او كياس فالشراع واسيبها فجيبي لحد ما الاقي صندوق مهملات

ومش بلاقي فبرميها على جنب

قريبا هتسمعوا عن تلك الحملة بس انا حبيت انفرد واكون اول اواحد يتكلم عنها

هي كانت معروفة في الكويت من قبل من ضمن حملات ركاز

خاطرة 2

قبل اذان المغرب

وانت امامك الفطار

والاكل كتير قدامك

جرب مد ايدك عشان تاكل

يا سلااااااام على الذل

متقدرش تاكل الا باذن من الرحمن

خاطرة

افضل شئ في رمضان هو ان المسلمين بيتجمعوا على حاجة واحدة

وهي الاكل

لان الصلاة في ناس مبتصليش..اما الفطار كله بياكل

السلام عليكم ورحمة الله وبركاته

الفكرة في غيابي هي اني تعلقت قليلا بالمدونة

فأخذت تحديا مع نفسي اني استطيع عدم اضافة اي رد او موضوع مدة طويلة استعدادا لرمضان

ولكني لا افكر في حذفها

حيث انه من الممكن اضافه اي خاطرة تخطر ببالى في يوم من الايام

والسلام عليكم ورحمة الله

و رمضان كريم

يمحو خطايكم ويكون سببا في العتق من النار بإذن الله