مجلس التأديب الذي رأيت
خلفية تاريخية
في شهر مارس 2010 قامت القوات الاسرائيلية بهدم مئات المنازل في القدس لبناء مستوطنات لليهود
وقامت بسرقة الحرم الإبراهيمي ومسجد بلال بن رباح وضمه فى تراثها بما عرف بالإفلاس الحضاري
ووسط سكون عربي .. قامت اسرائيل بفتح كنيس الخراب ملاصقة بالمسجد الأقصي مما يعتبر تدنيس وانتهاك لمقدسات المسلمين
واقتحامات وتهديدات بهدم المسجد الاقصى يوم 16 مارس
فخرج المرابطون فى القدس وتركوا منازلهم ليحموا المسجد الاقصى بأجسادهم فقط
وأعلنت اسرائيل ان عام 2010 هو عام تهويد القدس
ملأ كل المسلمين الغضب ولم يمتص غضبهم زعيم عربي حكيم ولو بالكلام
فالكل كان في خذلان وكأن المسجد الاقصى أثر ومقدس عند فلسطين فقط !! ا
وخرجت المظاهرات فى كل البلدان العربية لمطالبة الحكومات بالتحرك وطرد السفير قدوة بفينزويلا !! ا
وهو خير الجهاد فهو كلمة حق امام سلطان جائر
وفي جامعتى قناة السويس بعد صلاة الظهر
دعا أحد الطلاب بالإنضمام للوقفة والدعاء للمسجد الأقصى
فما كان أمامي الاختيار إلا ان أشراكهم الدعاء و مطالبة الحكومة بالتحرك
وبعد أسبوع وجدت قرار تعسفي صادر ضدى أنى ممنوع من دخول الجامعة لحين عقد مجلس تأديب
ونص الإتهام هو : لأنه شارك لمناصرة الأقصى وقال عبارات تخرج عن الشرعية منها:
ماتش الكورة يقوم دولة , والأقصى إتباع بالمقاولة
وبعد اسبوعين تم عقد مجلس التأديب
فوجدت فى المجلس المستئار القانونى للجامعة , وكاتب فقط
فسألتهم : اومال فين المجلس ده؟؟
قالى : هما جوا انت اتكلم هنا وبعدين روح
قلت: انا مش هتكلم غير امام المجلس
قالى : ما هو دا المجلس
!!!!
فبدأ بالإستجواب : ما ردك على التهمة الموجهة إليك انك
شاركت لمناصرة الأقصى
علقت : يالها من تهمة شنعاء
استكمل المستشار : وقلت عبارات تخرج عن الشرعية منها:
ماتش الكورة يقوم دولة , والأقصى إتباع بالمقاولة
فعلق المستشار : عندكوا حق والله .. البلد قامت عشان الجزاير ومحدش اتكلم عن الاقصى
قولت : اه انا شاركت و"الحمد لله " ا
قالى : لمصلحتك قول انك ما شاركتش
قولت : خلاص ما شارتكش
قالى : إمضي
قولت مش همضى غير ادام المجلس
فدخلنا عند عميد الكلية
فقولت له : انا عملت ايه غلط ؟؟
قالى: انك إخوان
قولت : انا مش إخوان
قال: اومال شاركت معاهم ليه
قولت : انا شاركت لمناصرة الاقصى وكنت أحب ان حضرتك تجيب الدكاترة وتيجوا تنضموا الينا وتشاركونا
قالى : ممنوع
قلت : انا في مجلس التأديب ده غلط
مش انا اللى المفروض انكم تستجوبوني
روحوا استجوبوا الطالب اللى رمى الدكتور بالجزمة
قال : وانت عاوزنا نضيع مستقبل الطالب!؟
قلت : لا طبعااااااااً
بس زي مانتوا مش عاوزين تضيعوا مستقبله .. ليه عاوزين تضيعوا مستقبلي
قال : جايلنا أوامر من الأمن .. بس الكلام ده ماتقولهوش لحد
قلت : طيب وانا بعمل مجلس تأديب ليه طالما الأمن بيتدخل!!؟
قال : إجراء روتيني
قلت : طيب انا مش همضي على المجلس ده
قال: بس انت لو ما ماضيتش هتتفصل
قلت: يعني حضرتك تقدر تمنعني من الفصل ؟؟
قالي : طبعا ان شاء الله .. ده انت ابنى وحابيبي وزي اولادي
فمضيت
بعدها ب 3 أيام صدر القرار بفصلي من الجامعة لمدة شهر
فقابلت العميد: هو مش حضرتك قولتلي انى مش هتفصل
قالى : ياعم كلها شهر .. والموضوع مش فإيدي .. دي أوامر من فوق
!!!!!!!!
المهم ان التيرم ده كان أجمل تيرم مر عليا رغم الإحساس المرير بالظلم.. وأنجزت فيه حاجات كان نفسي اعملها من سنة أولى .. وجبت فيه اعلى تقدير في السنوات كلها
2 comments:
كل عام وأنتم بخير
عام هجري سعيد
thank you
سعودي اوتو
Post a Comment